Allama Khadim Husain Razvi / علامہ خادم حسین رضوی

🌷دیدہ ام مردے دریں قحط الرجال🌷

تیرگی سے جو شب بھر لڑا تھا

وہ دِیا مــہر و مــہ سـے بڑا تھا

”ع ل ا م ہ خ ا د م ح س ی ن ر ض و ی“ ایسی شخصیت کو خراجِ تحسین پیش کرنے کے لیے شاید لُغَات میں وہ الفاظ ہی نہیں ہیں جو ان کے مجاہدانہ و غازیانہ کردار کی اس طرح غمازی کرسکیں جیسا کہ علامہ صاحب کی شخصیت کا حق ہے۔علامہ صاحب سے میری کبھی بالمشافہ ملاقات نہیں تھی صرف دو بار ٹیلی فون پر بات ہوئی تھی اور بہ حیثیت سید کے انھوں نے جس ادب اور محبت کا مجھ سے اظہار فرمایا وہ بتاتے ہوئے مجھے جھجھک محسوس ہوتی ہے بس اس پر اللہ انھیں اجر عطا فرمائے۔باوجود ملاقات نہ ہونے کے مجھے ان کے کردار،ان کے نظریے اور ان کے مشن کی وجہ سے ان کے ساتھ جو محبت و عقیدت تھی وہ الفاظ میں بیان کرنا میرے لیے ناممکن ہے۔

گئے دنـــوں کا سُراغ لے کر کدھر سے آیا کـدھر گیا وہ

عجیب مانوس اَجنبی تھا مجھے تو حــــیران کر گیا

(ناصرؔ کاظمی)

کسے خبر تھی کہ دیہات سے تعلق رکھنے والا مدرسے کا ایک طالب علم اپنی تعلیم مکمل کرنے کے بعد کئی سال کروفر کے ساتھ مسند تدریس پر بِتائے گا اور اس کے بعد دین کی خاطر اپنے سر پر اس وقت کفن باندھ کر نکلے گا جب ایک حادثے میں وہ دونوں ٹانگوں سے بھی معذور ہوچکا ہوگا اور اس وقت اسلام کی خاطر کھڑا ہوگا جب عالَمِ کفر اپنے مسلمان گماشتوں کو ہی استعمال کرکے اسلام پر یلغار کر رہا ہوگا اور حلقہء درویشاں کا یہ مردِ مجاہد اس وقت نکلے گا جب بڑے بڑے صاحبانِ جبہ و دستار اپنے مفادات اور مصلحتوں کی خاطر دینی حمیت کو خیرباد کہہ چکے ہوں گے اور بہ ظاہر یہ بے سرو سامان شیخ الحدیث عشقِ رسالت مآب کا عَلَم اس انداز سے لے کر میدان میں اترے گا کہ قرون اولی کی یاد تازہ کردے گا اور اس انداز سے میدان میں اترے گا کہ قیامت تک آنے والی نسلیں اس پر فخر کریں گی اور فروعی اختلافات کو بالائے طاق رکھتے ہوئے ہر آنکھ اس کے بچھڑنے کے دکھ میں اشک بار ہوگی اور ٹانگوں سے معذور اس شیخ الحدیث کے نام پر ہی اپنے ہزاروں جسمانی تن درست مگر ذہنی طور پر معذور شیوخ نچھاور کردیں گی۔

علامہ صاحب ایسی عبقری شخصیات روز روز پیدا نہیں ہوتیں جو صرف یہ نہیں کہ خود ایک بیدار مغز اور بیدار دل انسان تھے بلکہ ان کے پاس تو خوابِ غفلت میں سوئے ہوٶں کو جھنجھوڑنے اور بیدار کرنے کا انوکھا ہنر موجود تھا اور وہ اس انداز سےغافلین کو بیدار کرتے کہ وہ خود بیداری شعور کے سفیر بن جاتے پھر اسلام اور عظمت مصطفی صلی اللہ علیہ وآلہ وسلم کے حوالے سے اس انداز سے تربیت کرنا کہ ان کے حلقے میں آنے والا ہر شخص سر بکف مجاہد بن جاتا،جس کی زبان پر صرف یہی نعرہء مستانہ ہوتا کہ

گریزد از صفِ ما ہر کہ مردِ غوغا نیـــست

کــسے کہ کُــشتہ نہ شــد از قبیلہ مانیست

اور اس قافلے کا بچہ بچہ ہر ایک غدار،گستاخ اور بے حمیت کو ہمیشہ دیوانہ وار للکار کر کہتا کہ

یہ بــات عیــاں ہے لــوگــوں پـــر

ہم پھول بھی ہیں تلوار بھی ہیں

بارگاہِ احدیت و احمدیت سے علامہ صاحب کے سر پر درد امت، وفا، ایثار، عِلم، تاثیر،جذبہ،حمیت،غیرت،

شجاعت،بہادری اور عشق و محبت کا جو تاج سجایا گیا تھا اس کی جھلملاہٹ صدیوں تک ماند نہیں پڑے گی۔

لیـــس علی اللہ بمستنکر

ان یجمع العالم فی واحد

کیا خوب کہا تھا کسی نے کہ

ایـــــثار و وفــــا،ســـوز و جنـوں،درد و تــــمنا

یہ ایــک لـــہو کتــنے چـــراغوں میں جـلا ہــے

علامہ صاحب کشتہء عشق رسول صلی اللہ علیہ وآلہ وسلم ہی نہیں تھے بلکہ اس ذات مقدس سے نسبت رکھنے والی ہر شخصیت اور ہرچیز سے والہانہ محبت ان کی شخصیت کا خاصہ تھی۔یہ بات ایک مسلمہ مگر تلخ حقیقت ہے کہ بند کمرے میں بیٹھ کر بلند و بانگ دعوے کرنا بہت آسان ہے،ہوا کے رخ پر اڑنا بہت سہل ہے،مصلحت کوشی روشِ عام ہے،مفاد پرستی،منافقت،ضمیر فروشی اور قول و فعل میں تضاد برتتے ہوئے اپنی اولاد اور دیگر وابستگان کے لیے دوہرے معیارات رکھنا عام ہوچکا ہے یوں کہہ لیجیے کہ

ہر شخص بنا لیتا ہے تہذیب کا معیار

اپنــے لیے کچھ اور،زمانے کے لیے اور

مگر ٹھٹھرتے سرد موسم،سخت وبائی ایام اور خوف واِبتلا کے دنوں میں اپنے اہل و عیال سمیت کھلے آسمان تلے چادر لپیٹ کر بیٹھنا اور اسی چادر کو سڑک پر بچھا کر اس پر سوجانا اور اسلام کی نظریاتی سرحدوں کی زندگی بھر پہرے داری کرنا علامہ صاحب کا طرہء امتیاز ہے اور شاید کسی نے ایسے ہی بطلِ حریت کے متعلق کہا تھا کہ

مــوجیم کہ آسودگی ما عدم ما ست

ما زنــدہ بہ آنــیم کـہ آرام نہ گــیریم

علامہ صاحب کو بارگاہ الوہیت و رسالت سے علم و معرفت کا جو غیر معمولی حصہ عطا ہوا تھا اور جس طرح انھیں عربی و فارسی زبان و بیان پر ملکہ حاصل تھا اور ان کو جس درجے کی ذہانت و فطانت سے نوازا گیا تھا اور جس بلاغت کے ساتھ وہ کلامِ اقبال کا قرآن و حدیث سے انسلاک و انطباق کرتے تھے ماضی قریب میں بھی اس کی کوئی مثال نہیں ملتی۔علامہ صاحب سے اختلاف کرنے والے حضرات اگرچہ بہت نکتہ چینی کی کوشش کر رہے ہیں لیکن باوجود تلاشِ بِسیار کے بھی یہ اعتراض کوئی نہیں کرسکے گا کہ علامہ صاحب نے فلاں حوالہ غلط دیا ہے،فلاں واقعہ غلط بیان کیا ہے،فلاں شعر غلط پڑھا ہے اور فلاں لفظ کا اعراب غلط پڑھا ہے اور یہ ان کا علمی تبحر ہی نہیں بلکہ معرفت کے بحرِ زخار میں برسوں غواصی کی علامت ہے۔

نہ دانم چہ جادوئیست بطرز گفتارش

کہ باز بـــستہ زبانِ ســـخن طرازاں را

اس گئے گزرے دور میں علامہ صاحب اس قافلہء عزیمت و حریت کے حدی خواں تھے جس کے پیشوا سیدنا امام حسین علیہ السلام اور سیدنا امام احمد ابنِ حنبل رضی اللہ عنہ تھے اور قیامت تک آنے والی عزیمت کی جتنی بھی تحریکیں اٹھیں گی ان میں علامہ صاحب کا نام ہمیشہ تابندہ و جاوید رہے گا اور جب بھی ان کا ذکر ہوگا تو دل و دماغ پکار اٹھیں گے کہ

چــہ ساز بود کہ بنــواخت مــــطرب عشاق

کہ رفت عمر و ہنوزم دماغ پر ز صدا اسـت

(حافظؔ)

علامہ صاحب ایسی ہمہ صفت شخصیات صدیوں بعد پیدا ہوتی ہیں اور ایسی عدیم النظیر شخصیات کے مقام و مرتبے کا ادراک ان کے چلے جانے کے بعد ہوتا ہے۔ ہمارے یہاں تو ویسے بھی خود کو منوانے کے لیے مرنا پڑتا ہے۔

نظیریؔ نیشاپوری کا یہ شعر علامہ صاحب کے لیے ہی معلوم ہوتا ہے۔

تو نظیریؔ ز فلــــک آمــدہ بودی چو مـــــــسیح

باز پـــس رفتی و کس قدر تو نہ شناخت دریغ

اللہ تعالٰی علامہ صاحب کی خدمات کے صلے میں ان کی نیابت کے لیے عالَمِ اسلام کو ایسی کوئی شخصیت عطا کرے جو نہ صرف ان کے لیے قبر میں راحت کا سامان کرسکے بلکہ مصطفوی مشن کو اسی توانائی،جرات اور ثابت قدمی کے ساتھ آگے بڑھا کر پایہء تکمیل تک پہنچا سکے مگر یہ بھی حقیقت ہے کہ ہر جانے والا اپنی جگہ یوں خالی کر جاتا ہے کہ

ز ہر چـمن کہ گذشتم بہ ہرگلے کہ رســـیدم

بہ آب دیدہ نوشتم کہ یار جائے تو خالیست

ناصرؔکاظمی نے یہ نوحہ کچھ ان لفظوں میں پڑھا ہے کہ

میں ان کی راہ دیکھتا ہوں رات بھر

وہ روشـــنی دکــھانے والے کــیا ہوئے

عشاقان مصطفی صلی اللہ علیہ وآلہ وسلم کی فہرست میں علامہ صاحب کا نام ہمیشہ دمکتا رہے گا۔

ہــرگز حـدیث زلف تو کوتہ نمی شود

ایں گفتگوئے تا بقیامت مسلسل است

دعا ہے کہ اللہ تعالٰی علامہ صاحب کے جذبہء حریت اور غیرتِ دینی کا خراج ہر امتی کو عطا فرمائے۔

سَیّـــد صِــــبغَتُ اللہ سُـــــہروردی

سربراہ:

دارالعلم والمعرفہ خانقاہِ قادریہ سہروردیہ شاہ آباد شریف